திருப்பதி ஏழுமலையான் கோயிலில் ரத சப்தமி விழா!

திருப்பதி ஏழுமலையான் கோயிலில் ரத சப்தமி விழா!
Advertisement
Advertisement

திருப்பதி ஏழுமலையான் கோயிலில் இன்று நடைபெறும் ரத சப்தமி விழாவை காண, லட்சகணக்கான பக்தர்கள் கோயிலில் கூடியுள்ளனர்.

திருப்பதி ஏழுமலையான கோயிலில், ஆண்டுதோறும் நடைபெறும் ரத சப்தமி விழா மிகவும் பிரசித்தி பெற்றது.

அன்று ஒரேநாளில் காலை முதல் இரவு வரை, 7 வாகனங்கள் வீதிஉலா நடைபெறும்.

அனைத்து வாகனங்களிலும் உற்சவர்களான ஸ்ரீதேவி-பூதேவி, சமேத மலையப்பசாமி சிறப்பு அலங்காரத்தில் எழுந்தருளி கோயிலின் நான்கு மாடவீதிகளில் உலா வந்து பக்தர்களுக்கு அருள்பாலிப்பார்.

காலை முதல் இரவு வரை நடைபெறும் இந்த வீதி உலா நிகழ்ச்சியில், 7 நாள் வைபவத்தை ஒரே நாளில் தரிசிக்கலாம் என்பதால், பக்தர்களின் வருகை அதிகமாக இருக்கும்.

அந்தவகையில் இன்று திருப்பதியில் ரத சப்தமி விழாவையொட்டி, வாகன வீதிஉலாவை காண லட்சத்துக்கும் மேற்பட்ட பக்தர்கள் கோயிலில் கூடியுள்ளனர்.

சூரிய பிரபை வாகனம் அதிகாலை 5.30 மணியில் இருந்து காலை 8 மணி வரை, சிறிய சே‌ஷ வாகனம் காலை 9 மணியில் இருந்து 10 மணி வரை,

கருட வாகனம் பகல் 11 மணியில் இருந்து மதியம் 12 மணி வரை, அனுமந்த வாகனம் மதியம் 1 மணியில் இருந்து மதியம் 2 மணி வரை நடக்கின்றன.

அதைத்தொடர்ந்து சக்கர ஸ்நானம் மதியம் 2 மணியில் இருந்து மாலை 3 மணி வரை, கல்ப விருட்ச வாகனம் மாலை 4 மணியில் இருந்து மாலை 5 மணி வரை, சர்வ பூபால வாகனம் மாலை 6 மணியில் இருந்து இரவு 7 மணி வரை, சந்திரபிரபை வாகனம் இரவு 8 மணியில் இருந்து இரவு 9 மணி வரை நடக்கின்றன.

கேலரிகளில் அமர்ந்து காலை முதல், இரவு வரை வாகன வீதிஉலாவை பார்த்து வழிபடும் பக்தர்களுக்குச் சேவை செய்ய ஸ்ரீவாரி சேவா தொண்டர்கள் நியமிக்கப்பட்டுள்ளனர்.

மாடவீதிகளில் 55 உணவு மையங்கள் அமைக்கப்பட்டுள்ளன. அங்கிருந்து கேலரிகளில் அமர்ந்திருக்கும் அனைத்து பக்தர்களுக்கும் அன்னதானம், குடிநீர் ஆகியவை வினியோகம் செய்யப்படும்.

பக்தர்கள் வருகையையொட்டி, அசம்பாவிதங்கள் நேராமல் இருக்க, திருமலை-திருப்பதி தேவஸ்தான பாதுகாப்பு மற்றும் பறக்கும் படை அதிகாரிகள், ஊழியர்கள் மற்றும் போலீசார் தீவிர கண்காணிப்பில் ஈடுபட்டுள்ளனர்.