தடையை மீறி அமைதிப் பேரணி நடத்தியவர்கள் கைது…!

தடையை மீறி அமைதிப் பேரணி நடத்தியவர்கள் கைது...!
Advertisement
Advertisement

கும்பகோணம் அருகே உள்ள திருபுவனத்தில் கடந்த 5ஆம் தேதி பாமக முன்னாள் நகர செயலாளர் ராமலிங்கம் மர்ம நபர்களால் கொலை செய்யப்பட்டார்.

அன்றைய தினம் காலை நடைபெற்ற மதப் பிரச்சாரத்தில் ஈடுபட்டவர்களை ராமலிங்கம் தட்டிக் கேட்டதால் தான் கொலை செய்யப்பட்டதாக கூறப்படுகிறது.

இதுதொடர்பாக 9 பேரை காவல்துறை கைது செய்து, திருச்சி மத்திய சிறையில் அடைத்தனர்.

இந்நிலையில் ராமலிங்கம் கொலை செய்யப்பட்டதை கண்டித்து, பாஜகவினர் இந்து மக்கள் கட்சி,

இந்து முன்னணி உள்ளிட்ட அமைப்புகள் இன்று ஒருநாள் கடையடைப்பு போராட்டத்திற்கு அழைப்பு விடுத்திருந்தன.

இதனையடுத்து கும்பகோணம், திருபுவனம், திருவிடைமருதூர் உள்ளிட்ட பகுதிகளில் சுமார் 10 ஆயிரத்துக்கும் மேற்பட்ட கடைகள் அடைக்கப்பட்டுள்ளன.

இதனையடுத்து ராமலிங்கத்திற்கு மவுன அஞ்சலி செலுத்தும் வகையில் அமைதிப் பேரணி காந்தி பூங்காவில் இருந்து நடைபெறும் என தெரிவித்திருந்தனர்.

இந்த பேரணிக்கு காவல்துறையினர் அனுமதி அளிக்கவில்லை. இதையடுத்து பேரணியில் கலந்து கொள்ள வந்த மாநில செயலாளர் மன்னார்குடி அருகே காவல்துறையினரால் கைது செய்யப்பட்டார்.

இதேபோல் இந்து மக்கள் கட்சியின் தலைவர் அர்ஜுன் சம்பத் உள்ளிட்டோரும் கைது செய்யப்பட்டனர்.

இந்நிலையில் கும்பகோணம் மகாமக குளம் வீரசைவ மடத்திலிருந்து பாஜகவினர் 50க்கும் மேற்பட்டோர், தடையை மீறி கும்பகோணம் நகரின் முக்கிய வழியாக பேரணியில் ஈடுபட்டனர்.

அவர்களைத் தடுத்து நிறுத்தி கைது செய்தனர். கும்பகோணம் முழுவதும் காவல்துறை குவிக்கப்பட்டுள்ளதால் பதற்றமான சூழ்நிலை நிலவுகிறது.