சின்னதம்பி யானையை கும்கியாக மாற்றக்கூடாது: உயர்நீதிமன்றத்தில் மனு..!

சின்னதம்பி யானையை கும்கியாக மாற்றக்கூடாது: உயர்நீதிமன்றத்தில் மனு..!
Advertisement
Advertisement

”சின்னதம்பி” காட்டு யானையை கும்கியாக மாற்றுவதற்கு எதிர்ப்பு தெரிவித்து, சென்னை உயர்நீதிமன்றத்தில் பொதுநல மனு ஒன்று அவசர வழக்காக தாக்கல் செய்யப்பட்டுள்ளது.

அந்த மனு இன்று மதியம் விசாரணைக்கு எடுத்துக் கொள்ளப்படும் என உயர்நீதிமன்றம் அறிவித்துள்ளது.

கோவை சோமையனூரில் சுற்றித்திரிந்த சின்னத்தம்பி காட்டு யானை கடந்த 25ஆம் தேதி பிடிக்கப்பட்டு டாப்சிலிப் வனப்பகுதியில் விடப்பட்டது.

ஆனால் வனப்பகுதியில் இருந்து வெளியேறிய சின்னத்தம்பி காட்டு யானை கடந்த இரு தினங்களாக அங்கலக்குறிச்சி, தேவனூர் புதூர் ,சாலையூர், உட்பட பல்வேறு கிராமங்களில் சுற்றித் திரிகிறது.

இந்நிலையில் சின்னதம்பி யானையை 50 க்கும் மேற்பட்ட வனத்துறையினர் கண்காணித்து வருகின்றனர்.

இந்நிலையில் இந்த விவகாரம் தொடர்பாக பேசிய மாநில வனத்துறை அமைச்சர் திண்டுக்கல் சீனிவாசன்,

சின்னதம்பி யானையை கூண்டில் அடைத்து கும்கியாக மாற்றுவதை தவிர வேறு வழியில்லை எனவும்,

இந்த யானையை பிடிக்க வேண்டும் எனவும் அமைச்சர் எஸ்.பி.வேலுமணியும், பொள்ளாச்சி ஜெயராமனும் கோரிக்கை வைத்துள்ளனர்.

அதன் அடிப்படையில் மீண்டும் யானையை பிடிக்க நடவடிக்கை எடுக்கப்படும் என தெரிவித்தார்.

இந்த நிலையில் வனத்துறை அமைச்சரின் கருத்துக்கு எதிர்ப்பு தெரிவித்து கோவை தெற்கு வட்டாட்சியர் அலுவலகம் முன்பாக சமூக ஆர்வலர்கள் ஆர்ப்பாட்டத்தில் ஈடுபட்டனர்.

ஆர்ப்பாட்டத்தின் போது சின்னத்தம்பியின் புகைப்படத்தை கையில் ஏந்தியபடி நூற்றுக்கும் மேற்பட்டோர் பங்கேற்று கண்டன முழக்கங்களை எழுப்பினர் .

அப்போது சின்னத்தம்பி காட்டு யானையை மீண்டும் வனப் பகுதியிலேயே விட வேண்டும், அதை கும்கியாக மாற்றக் கூடாது என அவர்கள் வலியுறுத்தினர்.

இந்நிலையில் வழக்கறிஞரும் விலங்குகள் நல ஆர்வலருமான அருண் பிரசன்னா என்பவர்,

சின்னத்தம்பி யானையை கும்கியாக மாற்றுவதற்கு எதிர்ப்பு தெரிவித்து, சென்னை உயர்நீதிமன்றத்தில் பொதுநல மனு ஒன்றை தாக்கல் செய்தார்.

அதில், யானையை அதன் வாழ்விடத்திலேயே கொண்டு செல்ல வேண்டும் எனவும், அதை கண்காணிக்க குழு அமைக்க வேண்டும் என்றும்,

யானைகளை வேறு இடத்திற்கு கொண்டு செல்வது தொடர்பாக விதிகளை வகுக்க வேண்டும் என அவர் பல்வேறு கோரிக்கைகளை வலியுறுத்தியுள்ளார்.

இதை ஏற்றுக்கொண்ட உயர்நீதிமன்ற தலைமை வழக்கறிஞர், நீதிபதிகள் சுப்பிரமணியம் பிரசாத் மற்றும் மணிக்குமார் அமர்வுக்கு வழக்கு விசாரணையை மாற்றினார்.

அந்த வழக்கு இன்று மதியம் 2.30 மணியளவில் விசாரணைக்கு வரும் என அறிவிக்கப்பட்டுள்ளது.