20 அடி உயரத்தில் இருந்து குறி சொன்ன பூசாரி தவறி விழுந்து பலி!

20 அடி உயரத்தில் இருந்து குறி சொன்ன பூசாரி தவறி விழுந்து பலி!
Advertisement
Advertisement

கோவை அடுத்த கண்டக்காமுத்தூர் பகுதியில் கோவில் விழா ஒன்றில் அய்யாசாமி என்ற பூசாரி 20 அடி உயர மரக்கம்பத்தில் இருந்து குறி சொல்லும் போது, தவறி விழுந்து உயிரிழந்தார்.

கோவை பேரூர் அடுத்த சுண்டக்காமுத்தூர் பகுதியில் உள்ள ஊர் பொது கோயிலான ஸ்ரீ அய்யாசாமி திருக்கோயில் மிகவும் பழமையானதாகும்.

அமாவாசை, பௌர்ணமி உள்ளிட்ட நாட்களில் சிறப்பு பூஜைகள் நடைபெறும்.

இக்கோயிலில் அய்யாசாமி என்பவர் பூஜை செய்து வந்தார். ஆண்டு தோறும் மஹா சிவராத்திரியை முன்னிட்டு அங்கு இரவு பூஜைகள் நடைபெறுவது வழக்கம்.

அப்போது நள்ளிரவில் கோயிலுக்கு வரும் பக்தர்களுக்கு மைதானத்தில் அமைக்கப்பட்ட 20 அடி உயர மரத்தின் மீது அமர்ந்து கொண்டு அய்யாசாமி குறி சொல்வது வழக்கம்.

அதேபோல் இந்த ஆண்டும் நிகழ்ச்சி நடைபெற்றது. பூஜை செய்யப்பட்ட மரத்தின் மீது ஏறி படுத்துக்கொண்டு ஆக்ரோஷமாக பக்தர்களுக்கு பூசாரி அய்யாசாமி குறி சொல்லிக்கொண்டிருந்தார்.

அப்போது திடீரென நிலை தடுமாறி மரத்திலிருந்து விழுந்ததால் அவர் படுகாயமடைந்தார். உடனே பக்தர்கள் அவரை மீட்டு அருகில் உள்ள மருத்துவமனையில் சேர்த்தனர்.

ஆனால் அங்கு அவர் சிகிச்சை பலனின்றி உயிரிழந்தார். குறி சொல்லிக் கொண்டிருந்த பூசாரி தவறி விழுந்து இறந்ததால் அப்பகுதி மக்கள் சோகத்தில் உள்ளனர்.